Anya, 18, yn ennill gwobr fawreddog Partner Centrepoint UK

Mae'r wobr hon yn cydnabod ei thaith ryfeddol a'i gwytnwch wrth oresgyn heriau sylweddol drwy gydol ei bywyd. Fe'i gwobrwywyd ddoe yng Ngwobrau Centerpoint yn yr Amgueddfa Brydeinig - Llundain. 

Mae Gwobrau Centrepoint yn dathlu llwyddiannau pobl ifanc sydd wedi dangos dewrder ac ymrwymiad eithriadol. Fel prif elusen digartrefedd ieuenctid y DU, mae Centrepoint yn cefnogi bron i 14,000 o unigolion ifanc bob blwyddyn, gan amlygu doniau a chyflawniadau amrywiol y rhai sydd wedi wynebu adfyd.

Mae Anya wedi dangos cryfder i symud ymlaen o dywyllwch yn ei phlentyndod ac wedi creu dyfodol disglair, nid yn unig ar ei chyfer ei hun, ond hefyd i gefnogi pobl ifanc eraill sy'n wynebu digartrefedd. Ar ben hynny, mae hi wedi llwyddo i ragori yn ei harholiadau. Mae hi wedi defnyddio ei phrofiadau byw i ddylanwadu ar wleidyddion i gefnogi pobl LGBTQ+ yn Gwynedd, a chychwyn grŵp celfyddydau perfformio, Nabod, sydd wedi datblygu'n sioe OLION gan Fran Wen. 

“Mae Anya wedi dangos penderfyniad aruthrol i drawsnewid ei bywyd yn llwyr. Mae’n cymryd cryfder unigryw i symud ymlaen o’r math o heriau a wynebodd yn ystod plentyndod i greu dyfodol mor ddisglair nid yn unig iddi hi ei hun, ond hefyd fel eiriolwr dros eraill yn ei chymuned. Mae’n wych iddi gael ei chydnabod fel hyn – rydyn ni i gyd yn falch iawn ohoni.” meddai Cari, Arweinydd Tîm De Gwynedd.

Mae’r wobr hon yn adlewyrchu’r cerrig milltir arwyddocaol y mae pobl ifanc fel Anya yn eu cyflawni, gan ein hatgoffa ni i gyd o’r potensial sydd o fewn pob un ohonynt. 

Dywedodd Sian Tomos, Prif Swyddog Gweithredol GISDA, “Rwyf mor falch o lwyddiant a chyflawniadau Anya. Mae hi wedi achub ar bob cyfle yn ystod y ddwy flynedd ddiwethaf. Mae hi'n haeddu'r ganmoliaeth uchaf. Diolch iddi am ei gwaith caled ac am fod yn llysgennad mor wych i GISDA. Diolch o galon hefyd i staff GISDA sydd wedi bod yn ei chefnogi. Da iawn Anya, rydyn ni i gyd mor falch ohonoch chi!”